O‘zbekiston Respublikasi Prezidenti Sh.Mirziyoyev tashabbuslari bilan mamlakatimizda “Payshanba — Yoshlar kuni” sifatida belgilangan bo‘lib, ushbu kunni mazmunli va samarali tashkil etish, yoshlarning bo‘sh vaqtini foydali mashg‘ulotlarga yo‘naltirish hamda ularning intellektual, ma’naviy va kasbiy salohiyatini oshirishga alohida e’tibor qaratilmoqda.

Shu munosabat bilan Toshkent shahridagi “MEI” milliy tadqiqot universiteti” Federal davlat budjeti oliy ta’lim muassasasi filialida talaba-yoshlar uchun darslardan so‘ng bir qator ma’naviy-ma’rifiy, sport, madaniy va kasbiy yo‘nalishdagi tadbirlar tashkil etilmoqda.

⏩ “Adiblar xiyoboniga tashrif”
Talabalar filialga biriktirilgan atoqli shoir va yozuvchi Maqsud Shayxzoda haykali joylashgan Adiblar xiyoboniga tashrif buyuradilar. Tashrif davomida yoshlar o‘zbek adabiyoti namoyandalari hayoti va ijodi bilan yaqindan tanishib, adabiyotga bo‘lgan qiziqishlarini yanada oshiradilar. Shuningdek, xiyobonda talabalar ishtirokida sport, she’riyat va badiiy-ma’rifiy tadbirlar o‘tkazilishi rejalashtirilgan.

⏩ “Shahidlar xotirasi” yodgorlik majmuasi va Qatag‘on qurbonlari davlat muzeyiga tashrif
Yosh avlod qalbida Vatanga muhabbat, milliy qadriyatlarga hurmat va tarixiy xotiraga sadoqat tuyg‘ularini mustahkamlash maqsadida talabalar “Shahidlar xotirasi” yodgorlik majmuasi hamda Qatag‘on qurbonlari davlat muzeyiga tashrif buyuradilar. Mazkur tashrif orqali yoshlar xalqimizning ozodligi, milliy o‘zligi, ilm-ma’rifati va Vatan ravnaqi yo‘lida fidokorona xizmat qilgan jadidlar va qatag‘on qurbonlarining hayoti hamda faoliyati haqida kengroq tasavvurga ega bo‘ladilar. Bugungi tinch va osoyishta hayot, mustaqillik va erkinlikning qadriga yetish, tariximizni chuqur o‘rganish hamda ajdodlar xotirasini e’zozlash — yoshlar oldidagi muhim ma’naviy vazifalardan biridir.

⏩ “INNO Techno Park”ga tashrif — zamonaviy bilim va kelajak kasblari sari
Talabalarning zamonaviy texnologiyalarga bo‘lgan qiziqishini oshirish, ularni innovatsion fikrlashga undash va kelajak kasblari haqida tasavvurlarini kengaytirish maqsadida **Olmazor tumanida joylashgan Oliy ta’lim, fan va innovatsiyalar vazirligi qoshidagi “INNO Techno Park”**ga tashrif tashkil etiladi. Tashrif davomida yoshlar zamonaviy muhandislik texnologiyalari, innovatsion ishlanmalar, robototexnika, texnologik loyihalar va kelajak kasblari haqida ma’lumotlarga ega bo‘ladilar. Ayniqsa, texnika va texnologiya yo‘nalishlarida tahsil olayotgan talabalar uchun bunday tashriflar nazariy bilimlarni amaliyot bilan bog‘lash, zamonaviy kasbiy ko‘nikmalarni shakllantirish va yangi g‘oyalar ustida ishlash uchun muhim imkoniyat yaratadi.

☑️ “Payshanba — Yoshlar kuni” doirasidagi bunday tadbirlar yoshlarning bo‘sh vaqtini mazmunli tashkil etish bilan birga, ularning ma’naviy dunyoqarashi, vatanparvarlik tuyg‘usi, ijodiy qobiliyati, sportga qiziqishi va zamonaviy kasbiy bilimlarini rivojlantirishga xizmat qiladi.

👉 Bugungi bilimli, faol va tashabbuskor yoshlar — Yangi O‘zbekistonning ertangi bunyodkorlaridir!
Web-sayt | Telegram | Instagram | You tube